Poesie dialettali

image_pdfimage_print

Un sogn tached m’un ciod
di Mario Foschi
Morciano di Romagna

L’è da quand ca sò burdel
ca sugneva ad ciapè al stel
… ma an sò mai stè bon ad fel.

Tsì riv te a caval d’un pnel
tsì andè sò a rubem al stel
tmè rubè e mi sogn bel.

Ma videndlie so at che mur
tla tu mostra, me a te giur
cu me pas tot i rancur

perchè ho vest e a so sigur
che e mi sogn, si tu culur,
l’è dvent mei… tached te mur.

Poesia ispirata nel visitare un’esposizione di quadri del pittore Emilio Cavalli.

La pesa
di Tina Biondi
Pesaro

Og 20 ad merz l’è al prim dè ad guera
sè, ma Sadam, sa l’America e l’Inghiltera
e par rasunè da par me, sa stal magon tal cor cum magna
a sò andè a fè ‘na camneda par la campagna.

Al sol cal lus ichè, sa stal teritorie
l’è al stess cal brela sora i pozz dal petrolie
i rem d’ielbure, dret vers al cel seren
um per di bracc chi prega mal Signuren.

Iè ‘na pesa d’intorne cant sent vulè ‘na mosca
l’erba cla sta par nas, vargugnosa las mostra
aò arcolt ‘na viuleta, enzi dò sultent
parchè um è pers da santì un lament.

L’era la viola clam giva pignend
“Perchè vuielt omne a si bon sol d’arvinè, senza cumprend?
A steva tent ben ichè sa li mi cumpagnie
lasme in pes, e pensa mal tu magagnie.

Cusc a cumbinè i lagiù tl’Irac
an capì cal pò nas un patatrac
av mazè sa li bombie inteligentie
mò da mez uiva sol li pori gentie.

Al patirà sol i burdel, al murirà un sac d’innucent
parchè anvlì capì cl’è un gran sbai duvrè iarmament
pruvè a cunvincie sa li bonie
chisà chin capesa cl’è mei a duvrè al cumprendonie.

L’è propria vera, l’om al sa sol arvinè al mond
ades pu ugni basta, al dovra anche li bomb
mò butè via tut ni cò tla mundeza
e ciarchè tal vost cor un po’ ad dulceza.

Finchè us è in pesa ma tut us pò armidiè
l’è quant us fa lita che lan spò più arcuncè
e sa sevesve quant us è rott i cocc
cum l’è fadiga armet insen iorc.

Ciarchè ad fè in mod cal fnesa supte ‘sta disperazion
e cus arvega i burdel a giughè sa iaquilon
pesa, pesa par tut, tli famei, tal lavor, tal mond sopratutt
in pesa ciarchena sempre ad risolv sal rasunament ogni dulor
parchè sol sa la pesa, us pò spirè che al mond al dventa miglior”.

Spirema at Garibaldi
di Mario Tonini
Riccione

Guerda pu da nu stè mel
perchè se t’è dla soferenza
e bsegna ch’it porta tl’uspidel
magari ad nota sl’ambulenza,

a stè me Sas o Montgrimen,
insoma chi post tuta muntagna
cl’è i cumun long e cunfen
tra al Merche e la Rumagna,

t’pò invuchè anché Nost Signor
da fet purtè a Remne o Arciun,
it dis che quest l’è aferi lor
e in pò stè a santì nisun

per cui tut quej de Marcaden,
Sas, Montgrimen, per paragon,
jà Sassocorvaro opur Urben
cumè uspidel ad destinazion.

Pora nun se ujè la neva,
se tvò cur drè me tu amaled,
un che prima u ni panseva
e capes quant cl’è disaged.

Se e ven da pansè che la quistion
las pò risolv oltre cunfen,
it dis che un gnè la convenzion
arnuveda se sted ad San Maren.

Vers catolga enchè i ni beda,
Gabecc, Gradera, i su amaled
jà bsegn da fej cur ma la streda,
a Pesaro dret jè destined.

Jà da pres una strutura
saniteria che l’è un vol
arvij da chesa s’jà premura
mo un si pò pasè e Tavol,

insoma s’us trata ad sanità
avem e cunfen, quel regiunel
che un cnes dl’Italia l’unità
e dli Tu esigenze dl’uspidel.

Per met a post sta division
cl’è fadiga propia a sbat
tla sanità ad du region,
Garibaldi uj vo ancora a cumbat.

© RIPRODUZIONE RISERVATA

Accadeva nel:

SEGNALA




Privacy*

FACEBOOK

La Piazza della provincia di Rimini. Redazione : Piazza Gramsci, 34 - 47843 Misano Adriatico | p.iva 02540310402 | Direttore Responsabile: Giovanni Cioria
© 2014 Tutti i Diritti Riservati | mappa del sito
Web Marketing Rimini
Condivisioni