Poesie dialettali

image_pdfimage_print

Il Parco delle Navi
di Giuseppe “Peter” Tonti
Cattolica

La sfà gneta sta pulonga
l’è per tzcur un po’ ad Catolga
senza astie, senza rancor
a vel giur sal mi unor
l’è sno in nom dla verità
parchè 100 un pensa e una u la fà
da un’idea del prim citaden
per fè vni la genta e anche i quatren
el dis ma la giunta riunida
a ho un’idea proprie garnida
at cli colonie abandunedie
a ho tla testa un gran rimedie
a fen in tera quel ch’iè in mer
dem reta, si no a fac quel cum per
adess a vel spiegh velocement
cus ca ho tla testa, quel ca ho in ment
a fen do tre vaschie, qualch pisulen
e a ricreen un perch maren
per nu fè tent cunfusion
ai mitin un sac ad television
dit e fat, ech che tun mument
us trova i soc e i finanziament
progetista, un sac ad genta a lavurè
l’è da es pront, per stelta instè
ma già dop dla prima stasòn
u se capì cl’era un mez bidòn
chel pruget cl’eva da arbaltè el mond
invece da stè a gala, l’è andè a fond.
Burdèll, el dis el president
a val digh trameza i dent
an gnè più un french, un s’va più aventi
la realtà, la è i chi daventi
ma l’Enel an s’pò paghè la buleta
perciò ogni asesor, la da tò na bicicleta
sa na dinamo ma la roda
e la da pidalè, chel và anche ad moda
a fen l’energia par cont nost
e sa quest a sin a post,
l’insaleda i la porta i cuntaden
i mariner i purterà qualch pisulen
a licenzien tri quert ad uperai
e i si ac truverin fora di guai
qui j dal cunsiglie d’aministrazion
i rinuncerà, ma qualch miliòn.
E no el dis el capocia, il progetto è mio
faremo, Operazione Squalo Anch’io
ma la posta a fen di buliten
u c’iariverà un sac ad quatren
e se i burdèll i romp el salvadener
ech ca salven cla specie ad mer.
Ma la più bela dli soluziòn
u l’ha avuda un birbaciòn
c’la dit sla facia seria, seria
burdèll, daventi a sta miseria
al savì cus c’avì da fè sa tut cal pès
un po’ al fè arost, e cl’elt aless.
Questa la è dal perch marèn la storia
che cume tut jinsugne, i s’ni va in gloria.

Al cuchel
di Fiero Gaudenzi
Cattolica

Al slerga li el
us elza al cuchel.
Al gira d’intond
al sfiora li ond.
E pu su, sempre più su
al gira, al fa l’arionda
us buta giù
cume cal fuss na bomba.
Drenta tl’acqua
al fa na bota
sal pess tal bech
anche sta volta.
Al gira lergh
al sbat li el,
le la vita dal cuchel.
Tutt insen la riunion
sa la riva tal sabion.
L’è un raz cal sgracia e via
drenta tal brench in cumpagnia.
La su vita la è tal mer
cum al fa per viv al mariner.

La piega
di Fiero Gaudenzi
Cattolica

Berluscaid u tà det un de
quel che ogg l’è in sen sa tè
Da quant t’è dett ca sin più s-gnur
tu tcè spianè cume la spoja sal stciadur.
Si: l’Italia la nazion
la ha subì tropp umiliazion
Invasion, vulcani e teremot
avin vù anche li bott
Aluvion e smutament
dett pien, tra meza i dent
fena al cont di rubament.
L’è sal sgument e gran dulor
tmi stè purtand via li quarenta or.
Pansand can gnè più cuscenza
al rubament dla contingenza.
Andù cla è andè la pietà
se tmi tò anche l’anzianità.
Quel cal fa li robie serie
u cià port via anche li ferie.
Nu parlena ad cal mascalzon
cal fa sparì anche la liquidazion.
Al bel, tal sè quel cl’è?
Anche l’uspidel tutc fè paghè.
Dim com ormai a sin?
Sa paghen quasi tutt li medicin.
Dato che tsè un cal sa fè
dop jutenta in pension tutc vo mandè.
E pal gudor ca avin da pruvè
sti pensiuned perchè ja da campè.
Quest ormai l’è ardut un sted
come quand us ciavessa
toch un impested.
Se tutt quest gli italien i la vutè
la nazion senza colpa la ha da paghè.
Un disastre pegg d’ogni tip ad guera
l’Italia proprie la nal meriteva.
Per guarì sta bruta storta streda
bsogna arcor mal dutor Bunega.
Cal cureva al bus del cul
cume cal fossa ‘na bruta piega.
Dop tutt quest ed anche pegg
per chi ha un buon udito
l’armarrà al degh: un sgond “Benito”.

Al mi bà um feva scola
di Giuseppe Lorenzi
Cattolica

Al mi bà um feva scola, da to moi… un è na fola!
Al giva: rossa, bionda, mora o bruna
bsogna zarchè d’avè fortouna.
Una dona cla nà caprecc, da arlivè par zorne trest!
e set dorme clat svegia un poc, tpo enca vinc oun terne al lott!
Ouh Madouna d’nassaseina cousch’ò fat in cla mateina!
Al giva sempra sta all’erta, noun imbroite quel,
stzi sla scheina de buratel!
Si ti dè pou al cmand, tved dal stell, se… ma tout l’ann!
Set tò na reimneisa, tout al de’ l’è na sourpreisa…
sla è dla Barafounda
preima lat dà oun chelz doep lat fà l’arionda…
cum la fiola dal por Bastcien
cla sla fa na masa sa quii d’Mourcien.
Se tve renta mal Fnil lan’à miga oun cor tent zantil…
preima ancor da cmanzè, stzi fneid bell bell sou ma l’alter…
e sla veiv in quel d’Arzon, pora te, teira zo soubte al pantaloun!
si tve dal paert ad SinZan, prest ou terd, tscruv oun ingann
e pò zou renta mal Foia l’è sigur na loenga storia…
la jà spess oun fior tal nez e giouvaca sin a Nadel!
Mal Gabec t’cour dre oun oca, gambia e pass ou casch ad sota…
Si tve dinsou vers Moundaen, tzi zaa fnì toun bel casein…
tna couseina sal ramajol, l’è de’ fat e ancor t’lavour.
Pasa doep ma Saludez, it cos arost coum al cunel,
preima reva e pò radis t’arvenz pataca e un inflis…
lat sfrombla intond e la mesa via… tan gni la fè piò a slicet via.
Si tve so pa Mountfior, sla vergogna li fa ounor,
ma Mountscud, pasa d’ardos,
ujè al stciadur pront se tfe fagot!
Pasa pò renta Courien, se tla bes ujè al maen!
Ma Mourcien, l’è mej tan ferma, tira al fied
e cour pò via,coun’è eria ‘n cl’osteria!
Gambia zir, va ma Bleria, ‘ndo al sta sempra sal nez preria…
quand tzi renta cal pount, mola tout sna ut ven oun colp!
Zaercla po ma Santarcanzle, al baia sempra cal paer e giavle…
Cour dinz zo, va ma la Tomba ma sta ben zeit, sna lat’tombla…
Par Gradera ou zo mal Rii, la n’è fata par stet a santì!
Sla è ‘d Pesara, va po pianen, sent’tla spous lant’vo mai bein…
pronta sla scthiopa in tla couseina, si tan foeug lat’tira lea…
Si tve doep renta Faen,
se tan’è al bleigh bon, l’è sempra fourien…
sit’to ‘na fouresta, tout al dè “che mael d’testa”:
la sbourbota e la sminestra,
tant’po masè invell, ougnè paesa fein a nota pèsta!
e slas’fa veda a fè enca i canelloni,
la n’è propria com la reclame cal fa Buitoni!
Vers Padaion ou la Casneina:
pougn e bes e doepp lat’arveina…
Ma Mountlur ou Mounbaroz
sou n’è la dmenga stzi za tal foss…
‘n tla Basa e ma Fanen, al dopra sna al randell
e sal magna enca al ciborie al vo quattrein e na folie!
Sou pal Mount e Santa Maria
uiè piò mounghenie da lat d’na segheria…
par la Catolga, liè ‘n po arziglidie,
slint’vo piò al vo dì cli è fnidie…
Tan vre fè la fein ‘d Saent Tmas, tout al volt tla to in te sac!
Maegra, grasa ou ceciotela
si tan si oun chaen la è sna d’quela…
Sla fa ciass e la è fora ‘damsura,
se lat ciapa ut fa nì la pela scura!
Si la paend oun po par sorta
al vo dì cla è propria storta
e sui ven enca al manfron,
si tan l’acountent lat taia soubte al quaon!
Adess sal roussie, brasilienie ou filippine,
se tan gni dè al baoc, lit fa oun quarantott!
E si tan si svelt, oltra al fagot,
t’arvenz sna sal ran e lit’to via enca i pann!
Si tan si oun sgnour, l’int vo piò…
mei t’impera, ades, sagnì so piò…
Doep al giva al mi bà:
si tan è pressa, me am so arcmand
e ringrezia da nou fel a cmand!
slit’fa po enca oun marmocc, stzi za sota tera a infraidè ioss!
a coi i speple sal mael ma doss tout al zorne a raspè tl’ort!
Spouste, spouste, tout im giva, amarcord snò cla mateina…
al treva al vaent, piova enca al bufeva…
l’era oun fred… porca mastela! Al mi bà, pardomne,
an l’ho scultè e guerda, ades, coum amartrov in quel…
drenta oun bus e sal guinzai… tan po dì gnenca “bai”…
nè fiadè, sna al bousch… impasta l’olie e’l distroutt
slat fa la pieda… l’è za oun loeus…
Ades c’avò arcount na storia nera… gi pou so soun’è vera!

Quand a vleva la caerna
di Giuseppe Lorenzi
Cattolica

Al mi bà al pourteva ma chaesa cass ad galera…
a vleva la caerna… ma l’era sempre paès.
La mi mà l’an saveva piò cum acountantec,
sa dou vèc inlited, alora l’acunceva al paès,
la touliva via la resta e sal paen grated e l’ov,
lac faeva dal polpete da licches i baff…
ma l’era sempra paès…
Sa tout i lavour che chielt in vleva fè,
us oufriva sempra al bà…
par tò qualch french ad piò…
a pulì gli Ouver in tl’acqua nira
e di sours chi zoumpeva ma dòs…
mal Kursaal ti “giardini” renta la Fulgida
anduchiera i gabinet dal fascisme
a pulì la #### dimpartout fin sora i mur
(an pos ancora capì cum i faeva)…
ougnera “l’alto senso civico”
cum al dis, adess l’asesor!
Me a sera sa lò, sna ma chaesa a faeva rabiè…
Spitemie l’instè sal lantarnen par fitè la chaesa,
isè andemie a dourmì tla capana
(dou metre e trenta par in long
e oun metre e vint d’largheza).
Zà, la capana… quand us’è burdel
la vida lat paer oun zough,
me e la mi sourela punta e cul
(al vo dì che al pid ad chl’elt l’è renta la tou faza)
i mi… tna reda da pret.
A ridimie touta la nota e la mateina
cum al terzarol dla pouppa par scapè…
Tout ni co’ pò par co’…?
Par faes quaiounè si vsen sa quii
chi aveva arscos ad piò e chi ad maench.

© RIPRODUZIONE RISERVATA

Accadeva nel:

SEGNALA




    Privacy*

    FACEBOOK

    La Piazza della provincia di Rimini. Redazione : Piazza Gramsci, 34 - 47843 Misano Adriatico | p.iva 02540310402 | Direttore Responsabile: Giovanni Cioria
    © 2014 Tutti i Diritti Riservati | mappa del sito
    Web Marketing Rimini
    Condivisioni